搜尋文章

18.12.14

【餓底報告】深圳湖貝夜市──平民宵夜天堂

餓底報料:小S(sinanju)(圖文由小S提供)

近幾年經常往返深港兩地,起初對深圳不太熟悉,亂食嘢又怕食物中毒,尤其記得朋友們對小S教路,如果在國內搵食唔想出事又食得安心啲嘅話,只要跟隨三大原則,就可減低出事機會。
湖貝夜市甚有大笪地Feel,不介意環境地踎的話,此處是經濟美味之選。(註:右下是從7天連鎖酒店房內拍攝之湖貝夜市)
達 人 國 內 搜 食 要 訣

(一)永遠都係去比較多食客嘅食店。
(二)香港人開設(坦白講喺國內嚟計,感覺上好似安全啲,當然都唔排除有肚痾嘅可能,就算喺香港食嘢都唔係百份百安全啦係咪?)
(三)要點係唔清楚嘅嘢就一定要問!例如放喺枱面嘅乾、濕紙巾、餐前小碟(如花生、醃菜)之類,就一定要問清楚!因為隨時每樣都要收費,以免埋單拗數搞到唔開心啦。

初 哥 國 內 搜 食 之 路

記得大概喺兩、三年前開始要跟進國內工作,好多時都係深夜才到達酒店,那時人生路不熟,都唔知邊度有嘢食,諗返起當時嘅日子真係冇啖好食,多數求其了事就算,只係完成工作之後,先至搵餐食得好啲。
想吃海鮮的話建議到樂園路華城,海鮮及菜色款式多。
初期都只係識去有啲名氣、信譽嘅食店,國貿區──盛八、大漁、德川、小肥羊;福田區──大飽口福、四海一家、木屋燒烤;食海鮮去樂園路嘅華城,但強烈建議唔好去「湛江」!去咗後悔咪話我唔事先講聲!
湛江亦是名店之一,但個人認為這區有其他更好的選擇。
發 現 平 民 美 食 天 堂

直至到第一次有伴同行,當時兩個人同樣咁肚餓,而又正直播緊《天與地》,我倆都唔想做偉大嘅家明,就膽粗粗四圍貢搵野食,忽然傳來好香炭火味,隨著氣味出處走,就發現一個宵夜天堂──湖貝夜市,此處位於東門近樂園路與湖貝路,側面係7天連鎖酒店(東門中心店)。

這夜市在日間是當地人買食材煮飯嘅市場,香港人稱呼為「街巿」,在日間一樣有很多食店,基本上由早到晚都係民工們的食堂,每日大概晚上8:00後就搖身一變,成為熱熱鬧鬧的飲食天堂。
近來在湖貝夜市也有日式壽司、刺身,壽司即點即握,三文魚刺身質素雖不及名店肥美,但入口新鮮。
在這裡見到的,大多數都是當地街坊和民工,環境就極似置身在十零廿年前的香港,有大排檔、燒烤、砂窩粥、餃子店、燒雞、即場做的手抓餅、海鮮、甚至近來開始有日本料理,真係應有盡有,保證一定有你喜愛的。而我本來都是住7天連鎖酒店(金龍店),知道有夜市後,就即時轉咗去湖貝嘅7天連鎖酒店(東門中心店)留宿。
日式食店除了壽司、刺身外,想吃熟食的話,也有炸物供應。
整個夜市有各式各樣食品,以砂窩粥和燒烤的檔口最多,雖然類別上是同一樣嘢,但每檔都各有特色。
湖貝夜市甚多砂鍋粥小攤檔,配料選擇多,真是想點就點!
情 有 獨 鍾 咱 家 燒 烤

在眾多攤檔中,我對「咱家燒烤」這店子情有獨鍾,皆因我第一次嚟就係光顧此店,幾乎所有食物我都好like,計有鲫魚、多春魚、草蝦、牛肉串、羊肉串、雞腿(雞翼就麻麻)、娃娃菜、金菇……多不勝數,睇相就知!
每次到湖貝夜市定必光顧咱家燒烤,除了食物水準合意之外,白老闆(相片中負責燒烤者)的好客態度亦是原因之一。
燒烤款式甚多,擺放得井井有條,而且價錢實惠。
羊肉串是每次必點之選。
我都帶左唔少朋友去食,最受朋友仔歡迎的係燒饅頭、豆腐皮、羊肉串、骨肉相連(帶有軟骨嘅豬肉)。
冬菇不會燒得過乾。
將豆腐皮包著蒜蓉、蔥粒燒,竟然非常惹味!不過,建議怕油的朋友記住叫「少油」!
後來發現老闆嘅身型同食嘢口味和我幾乎一樣,佢份人老實又好客,現在我倆已經是好朋友了。

小 S 深 圳 搜 食 貼 士

俾個小貼士大家,在深圳想食宵夜的話,最好就23:00至02:30,至於東門步行街那邊03:00都會開始收檔,即係話想有啖好食就唔該喺02:00前。但係記緊要睇清楚衛生情況,食完肚痛、肚痾就唔抵啦。

最後還有一點想提示大家,這事暫時還覺得有點無奈.....唔知到大家北上消費,有冇遇著收費不一呢?即是店鋪向客人收費,本地人會比遊客便宜,所以,任何時候都記緊問清楚價錢啊!
同場加映:樂園路翡翠餐廳口水雞、清湯腩、海蜇(RMB¥ 18)。
本文提及食肆資料:

華城漁港
地  址:羅湖東門樂園路101號
電  話:(0755)8218 1660 / 8223 7488
營業時間:1000至2300

湛江漁港(總店)

地  址:羅湖東門樂園路50-54號
電  話:(0755)8222 6908
營業時間:0930至0000

咱家燒烤

地  址:羅湖東門湖貝夜市

翡翠餐廳

地  址:羅湖東門樂園路

湖貝夜市交通:
深圳地鐵湖貝站B出口(湖貝夜市位置於7天連鎖酒店側)。

湖貝夜市位置於7天連鎖酒店側(圖中藍色「7」字就是7天連鎖酒店)。
搜食狂人呼籲:本報告出自「餓底兵團@搜食狂人」成員的親身飲食經歷,並且由餓底自費 品嚐,旨在為各位搜食之友提供參考,本站無法保證相關食肆的食物水準、環境、服務質素、優惠及價錢不變,敬請留意。如對本文內容有任何疑問或意見,歡迎到 《搜食狂人》的Facebook粉絲專頁(網址:http://www.facebook.com/fooddiscuss.fans)留言。

Related Posts Plugin for WordPress, Blogger...