搜尋文章

11.5.15

【人情味專訪】艾威的《搜食秘笈》(上)

艾威講飲食,爆笑兼餓極!

不得不事先聲明,絕對有理由相信本文內容可能令人肚餓,建議飽肚欣賞。

如因本文內容引起流口水、輾轉反側、煩躁不安……等「看到吃不到飢餓症候群」徵狀,本站絕不負上任何責任,敬請留意!

攝影:Stephen@URIAH
撰文:搜食採訪組
場地:創動力媒體
鳴謝:(排名不分先後)艾威與多位餓底朋友提供部份圖片、甄子程Leslie、「百寶雞」梁虹光師傅



自言頗「為食(饞嘴)」的艾威哥,只要一有時間便四出搜食,無論各地平貴菜色,總之想試就試,話題自然就由他的《搜食秘笈》開始……


自言「為食」的艾威哥,喜歡四處搜食,要是遇上水準不錯的食肆,亦樂於與大眾分享,而且,他更喜歡以幽默的方式形容美食,例如:冇得輸炸雞髀、全宇宙最似金魚尾的雲吞……等等,引起大家肚餓之餘,亦同時讓人笑飽,絕對是飲食節目主持人選之一。

「我份人冇乜記性,香港好多食店我都鍾意幫襯,但好多時識點去而唔記得名!」艾威哥說罷忍不住哈哈大笑。


艾威哥口中「積福街尾轉彎位食生牛河」就是這家「林園甜品粉麵小食」,在大圍開業已逾廿年,有飯有粉麵亦有甜品,港式越式兼備,艾威哥則最欣賞此店的越式生牛肉河。
由梁虹光師傅以秘方加上獨特刀功而成的「百寶雞」,在艾威哥的「搜食秘笈」中佔一席位,有興趣一嚐滋味的朋友,建議預早兩小時致電:2601 1111訂購,逢星期三休息。

的確,他向筆者推介的食肆,當中有許多是:「積福街尾轉彎位食生牛河」、「大圍煎肉餅飯」、「上海街165號左右一間雲吞麵」……等等,不過,仍有一些食店的名字能夠讓他留下深刻印象:「以前在大圍住咗段時間,依家間中都會揸車返去搵嘢食,其中有間叫做『百寶雞』,只做外賣,但由於用秘方烹調,味道好特別,只此一家!雞皮爽而肉質嫩,入口唔會一口肥油,大大減低罪惡感!老闆刀功更加抵讚,形容唔到,必須親身見識過至明白!講起上嚟,想立即去大圍買嚟食!」筆者曾於大圍居住過一段日子,因此,艾威哥提及「百寶雞」,亦同時勾起筆者許多難忘回憶。


艾威哥在社交網站發分享道:「即燒,即食,即飲,即醉,燒肉+孖蒸,中國飲食絕頂配答,永合隆,旺角砵蘭街392號。」(圖片由艾威哥提供)

另一間是近太子港鐵站的「永合隆」,說來亦巧合,此店同樣是筆者從小已喜歡的燒臘店,每逢大時大節,必見排隊買燒肉做節的「人龍」。近年,燒腩或沙梨篤(即豬的臀部)因食家推介、媒體報導打得火熱,不過,艾威哥卻別有一番見解。


永合隆飯店是老字號,多年來深得許多食客支持,艾威哥亦在其中,他每次到此店例必購買「不見天」部位的燒肉,只因皮脆肥膏爽口。

「燒肉皮脆肉唔會太乾太韌當然重要,如果加埋肥膏部份能夠做到爽口,就更抵讚!個人比較偏好『不見天』位置,即是豬前腿上面部份,一般用嚟煲湯,其實呢個部位肥瘦適中,就算燜、燒都得,去親『永合隆』我每次去都指定要食『不見天』,不過,好老實都試過出現醃味唔勻嘅情況,但整體水準唔錯。」除了「永合隆」之外,他亦推介了中環的「華豐燒臘」。


艾威哥所形容的「絕對冇得輸炸雞髀」,引得筆者於訪問翌日親到小店打探,一試之下,筆者亦要舉手投降,的確「冇得輸」。(圖片由艾威哥提供)

喜歡四出搜食的艾威哥,近期亦有新推介──就是「絕對冇得輸炸雞髀」,他更在社交網站撰文:「試過包你唔會再嘥時間排隊去食韓國炸雞,如果全知賢知道香港有咁好食嘅炸雞都會搬過嚟香港住,何文田梭椏道6號B。」筆者除了加個句號標點符號外,皆原文照錄,只是文字已令人垂涎,當然要請他親身解構這款「絕對冇得輸炸雞髀」。


原來這道「絕對冇得輸炸雞髀」是小店大廚魏師傅的用心之作,至於這道炸雞髀的「秘密」,請留待專訪以外的食記詳解。

「我對炸雞髀有個比較難忘嘅記憶,中學讀書時期,會與同學到尖沙咀五枝旗桿附近嘅『美心』食炸雞髀,好好食!但之後間『美心』冇咗,就食唔到相同水準。好懷念,所以見到食店有炸雞髀都會試下,早前路經梭椏道,一間叫做『大胃之皇』嘅小店,竟然食到絕對係冇得輸嘅炸雞髀,皮脆到一咬入口就有好似食薯片咁嘅聲,雞肉好嫩,近骨位都冇血水,味道唔會過鹹過淡,不過,始終最欣賞呢間舖頭做到皮脆但唔會食到成口油嘅感覺!原來廚師將雞髀醃過夜之後風乾,有客叫至即刻炸,嘩!依家講起都好肚餓!」莫說是艾威哥,就連筆者聽完他的形容,肚內的「搜食份子」亦在雀躍起來,巴不得立即先吃為快!如果由他擔任飲食節目主持的話,相信除了令人肚餓之外,觀眾亦必定開懷大笑,甚至因而練出腹肌!

(待續……)

搜食狂人呼籲:本文由人情味角度出發,與大家分享受訪者的飲食回憶及感覺,內容純屬個人主觀。如對本文內容有任何疑問或意見,歡迎到《搜食狂人》的Facebook粉絲專頁(網址:www.facebook.com/fooddiscuss.fans)留言。

Related Posts Plugin for WordPress, Blogger...