搜尋文章

3.6.15

【人情味專訪】星級餓底──黃文標(附食譜)

幕前的黃文標(標哥),以「鬍鬚」造型及飾演「惡霸」深入民心,但原來現實生活的他,為人友善兼且玩得!而更重要的,是他同屬饞嘴一族,愛吃又愛煮,當筆者邀約訪問的時候,他二話不說一口答應,更即時表明身份:「我係餓底!」

攝影:Teo Lam
撰文:見習校對
場地:創動力媒體PTS Steel Shop
鳴謝:黃文標提供部份珍貴圖片、甄子程Leslie




標哥坦言自己天生「為食(饞嘴)」,尤其鍾情海鮮滋味。

「我細細個已經好鍾意食海鮮,記得以前住石硤尾徙置區,即係嗰種『H』型嘅七層大廈,居住環境比較差,一家八口迫埋喺九呎乘十呎嘅地方,煮嘢食都要喺屋外用火水爐。當時屋企雖然唔係有錢,但媽咪都會間中去街市買份細細隻嗰種瀨尿蝦灼俾我哋食,好平、好簡單嘅嘢,不過,當時嚟講已經覺得好滋味!」後來家境逐漸改善,標哥的父母亦不時帶領一家大小出外用餐,當中亦不乏海鮮類菜餚,這些都是標哥兒時最溫暖的回憶,但若論「想當年」最難忘的滋味,則是一道現已失傳的美食。



說到飲食,標哥立即眉飛色舞,熱愛之情憑此照可證。

難 忘 兒 時 失 傳 滋 味

「以前喺屋企樓下有好多推木頭車嘅走鬼檔(流動熟食小販),林林總總乜都有,當時仲有賣蜆嘅小販,不過,做法有兩種,一種係現時去中菜館、大牌檔都食到嘅豉椒炒蜆;另一種就係用少少水烚,再配一種甜甜酸酸又帶微辣嘅醬汁,價錢比豉椒炒蜆平,好似係一毫定斗零(五仙)咁上下就有十幾隻,兩種做法我都食,但特別鍾意烚嗰種,因為咁至食到蜆嘅鮮味,重點係個醬汁好特別!有尐似食潮州滷水鵝嘅蘸汁,但會再濃稠少少,味道特別到今時今日都仲係好記得,醒胃又可以帶出蜆嘅鮮甜,用料夠唔夠鮮真係一食就知,可惜現在已經搵唔返喇!」究竟是因為自小對貝殼類食物留下了深刻印象,抑或出於本能地愛上,就連標哥自己也說不出原由,他只道:「我真係好鍾意食海鮮,特別係貝殼類,一見到就要同佢死過!哈哈哈!」由此可知,他對貝殼類食物愛得有幾深。



特別鍾情海鮮滋味的標哥,與女朋友二人世界亦多數以海鮮為主菜。(照片由標哥提供)

愛吃的標哥,同樣是一位愛煮之人,閒來也會在家中捲起衣袖烹調一頓美食,原來,未走上演藝生涯之前,他曾涉足飲食界。

被 圍 毆 的 西 餐 學 廚

「我讀完工科出嚟第二份職業就係西餐學廚,講起上嚟已經係1979年嘅事,有朋友問我有冇興趣試下(學廚),話介紹我去中環希爾頓酒店(現已拆卸)學西廚,我自己鍾意食,所以都會好奇究竟點煮,於是咪試下囉!」

部份廚師的工作時間甚長,標哥學廚的時候,亦屬此類──早上工作至午市過後「落場」小休,之後再繼續工作到食肆收舖,不少當廚的也喜歡在「落場」時間以「賭」和「嫖」去打發,本已不喜歡聯群結黨的標哥,更對這些「落場」活動毫無興趣,然而回家一來一回甚花時間,年輕力壯又睡不到太多,於是,每逢「落場」時段,便跑去觀摩師傅烹調菜餚,既打發時間,亦順道從旁「偷師」。



自言「為食」的標哥,不時在家中烹調美食,這碗燜乾鮑湯麵就是「文標出品」。(照片由標哥提供)

正所謂「近廚得食」,師傅喜歡於「落場」時間鑽研廚藝,站在旁邊觀摩的標哥,既是師傅的差遣首選,但亦同時獲得「先吃為快」的機會,有得學又有得食,更可以打發時間,一次過滿足了三個願望,快哉!本來,標哥繼續當廚的話,相信能在廚藝界「煮出個未來」,可惜,因為標哥「不埋堆」以及觀摩師傅烹調之舉,惹來其他師兄不滿,最初只限於言語上單打,但後來卻演變成圍毆。

「因為總廚退休,所有人都可以升一級,當時成班師兄裡面,有個做咗四年先因為呢個機會升職,而我剛入行半年都冇亦有得升,所以人哋唔開心,咪成班一齊打我囉!第二日,我口腫面腫走去辭職,大廚見到都問發生咩事,但我冇講,因為如果一講件事出嚟佢哋就冇得做,反正我仲後生可以轉行,而且我自己都唔鍾意做廚師嘅返工時間嘛,咪話覺得自己唔適合呢份工就算。」幕前的惡霸,現實生活中卻是一個大好人,願意為別人設想,不管是曾經傷害過他的人。



雖然標哥飾演過許多「惡霸」角色,但私底下友善隨和,看他與《子程扮熟》主持人甄子程合照時老友鬼鬼兼笑得開懷,這才是標哥最真實的一面。

熱 心 分 享 鮮 味 食 譜

雖然在當廚的路途上遇過不快,但另一方面,卻加深了他對飲食的興趣。標哥謙稱自己的烹調技巧只屬「皮毛」,反而「為食」多於一切,不過,筆者於訪問前邀請他為網友送上食譜,他竟然非常貼心地準備了兩道經濟又容易的菜餚,包括清蒸海魚和凍烏頭。



標哥入廚貼士:「要蒸幾耐其實視乎魚身厚薄,但一斤重嘅魚通常八分鐘就差唔多,真係比較厚身嘅,可以用刀輕輕喺較厚部份開一、兩刀。除非唔打算食魚皮,否則,蒸魚記住唔好落鹽,因為部份好似斑呢類魚,落鹽就會令魚皮變韌。」

標哥入廚貼士:「做凍烏頭比蒸魚更容易,就算蒸過火少少都唔怕,又可以放雪櫃保存兩日,但記住一定要用海烏頭至冇泥味,可以去街市嘅鹹水魚檔買到海烏頭。」

上文曾提及標哥最愛的海鮮是貝殼類,為甚麼會選兩道以魚入饌的食譜送給大家?

「考慮過有尐朋友可能怕食貝殼類,魚係普遍家庭都會整,家常便飯甚至宴客都可以,再加上我本身鍾意釣魚,釣到魚當然要煮嚟食,所以諗到將呢兩個食譜同大家分享。有時出海或在維港釣魚釣著尐魚毛仔,我都會拎返屋企洗淨切好放冰格,留番第日煮湯,唔好浪費吖嘛!」標哥坦言近年偏愛到魚排釣魚,以免「打龜(沒有收穫),一班朋友釣完之後,亦順道在魚排開餐,一邊品嚐收穫的滋味,一邊暢談當日釣魚的趣事。



標哥坦言享受釣魚的過程,此照攝於上月底(2015年5月28日),當日在魚排足足釣了十三條斑,總重逾百斤,他直呼「過足癮」!(照片由標哥提供)

愛吃又愛煮的標哥,曾萌生開食店的念頭,可惜,香港的營商環境令他卻步。

「香港做飲食業好困難,租金負擔太重!我對飲食係好有興趣,雖然唔算叻或者好有研究,但都有諗過喺網上分享飲食方面嘅感受、食譜,有個朋友同我傾過下向呢方面發展,希望成事啦!係喇,幾時要餓底試食可以搵我喎!」

收到標哥!以後餓底出動一定預埋您!

後記──現實中的「滕翼」

許多觀眾見到黃文標,就會聯想「惡人」、「壞人」,而最近在「港視」播出的《歲月樓情》中,他飾演「漏廢」一角,更是令人恨得咬牙切齒!但對筆者而言,他卻一直是電視劇《尋秦記》裡面義蓋雲天的「滕翼」,而與他接觸過之後,更會發現他非常顧及別人感受,以及樂於助人的優點,簡直就是「滕翼」的現實版。

衷心期待欣賞到更多標哥的演藝作品之餘,更希望盡快可以看到他更多飲食分享。



標哥在照片說明寫道:「作為宵夜一個人食一隻會唔會過份左呢?」大家意下如何?(照片由標哥提供)

搜食狂人呼籲:本文由人情味角度出發,與大家分享受訪者的飲食回憶及感覺,內容純屬個人主觀。如對本文內容有任何疑問或意見,歡迎到《搜食狂人》的Facebook粉絲專頁(網址:www.facebook.com/fooddiscuss.fans)留言。
Related Posts Plugin for WordPress, Blogger...