跳至主要內容

【搜食直擊】黃文標試菜:銅鑼灣温野菜(ON-YASAI)

星級餓底黃文標(Uncle Piu)與本站編輯室的Eva同樣熱愛旅行、熱愛品嚐美食,而每逢去到日本,Shabu Shabu是例牌「搜食」目標,所以,「温野菜」於銅鑼灣Plaza 2000(二千年廣場)開設分店的報導,由二人為大家「實食」──即是實地試食,肯定「冇黐牙」!

攝影:Eva、V仔
撰文:搜食採訪組
編輯:Eva、Ha
鳴謝:黃文標@星級餓底




食物選擇比起尖沙咀店初開業時更多,午市定食由HK$78至HK$238(其中亦設有「Green Monday推介」);而晚市定食則由HK$178(Green Monday推介)至HK$528不等(本文內所有提及之價格須另收加一服務費),定食基本配昆布湯底,可加錢升級為特色湯底。除了定食亦可散點,豐儉由人。而環境及設備方面,銅鑼灣店則更勝尖沙咀,例如每張桌子增設電腦按鍵,只要按下所選服務,如【加茶】、【加湯】、【其他服務】或【結帳】,店員配載的手錶型接收器便會發出通知,感覺有型又方便!







Uncle Piu:間開每張枱增加私隱度,唔使怕一路食嘢一路畀人睇住唔自在。




Eva:設有幾間VIP房,就算大聲啲傾偈都唔怕嘈到人。問過店員,暫時未設立VIP房最低消費,但必須要預訂。

環境雖好,但焦點還是食物質素,在選擇方面跟尖沙咀店一樣,並新增了限定推出的「藥膳橄欖湯」(HK$39 / 一人;套餐升級HK$20 / 一人)。




「藥膳橄欖湯」──即是「經典藥膳湯」的「加料美顏版」,新加入了橄欖、橄欖油及辣椒而成,橄欖油含豐富的奧米加9脂肪酸,有助預防日常不良生活習慣引致的疾病,改善皮膚乾燥等問題,明顯為注重健康一族而設,所以味道上亦偏向清淡。

除了以上期間限定湯底之外,Eva與Uncle Piu特別提升「食力」,點了多款美食,並從中為大家精挑心水推介。

有機豆乳湯(HK$29 / 一人;套餐升級HK$10 / 一人)






Uncle Piu:有機豆乳湯入口滑溜,由於加入雞湯,味道略帶鹹香,同牛肉味道好夾。另外,不能錯過湯面的腐皮,入口香滑可口,而且有得食有得玩!但要留意「睇火」,因為個湯好容易滾起,唔小心就會搞到一枱都係!唔信?自行睇下《搜食狂人》Facebook專頁,有片為證!(網址:https://www.facebook.com/fooddiscuss.fans/videos/1001234726619088/

野菜五品盛(HK$49 / 客)




Uncle Piu:鍾意食蔬菜但又有選擇困難症的話,不如就揀呢個野菜五品盛合,一次過食到「温野菜」名物──生菜、旺菜、水菜、啡金菇同甘荀絲。


Eva:生菜爽脆鮮甜,就算即時生食感覺都好正!建議大家輕輕淥幾下就食喇!補充番,呢個野菜五品盛合除咗散叫,部份定食都有包埋。


金時蕃薯(HK$19 / 客)




Eva:金時蕃薯來自四國德島縣,入口清甜而軟糯。


Uncle Piu:呢隻蕃薯由於已切簿片,所以放湯淥三分鐘左右食得,如果超過五分鐘嘅話就會溶入湯中。


紅芯大根(HK$12 / 客)






Eva:呢個好似花咁靚嘅係紅芯大根,即係日本紅心蘿蔔,淥兩分鐘左右就食得,入口鮮甜冇渣,據講呢種紅心蘿蔔裡面含有花青素,除咗令到蘿蔔個樣更靚,仲有抗氧化、延緩衰老、增強血管彈性、增進視力,以及令皮膚更光滑……


Uncle Piu:換句話講即係食咗就可以變靚啲!食咗係咪變靚啲?立即變靚定逐漸變靚?我淨係知好食就得喇!


佐賀A5黑毛和牛西冷(HK$168 / 客)






Uncle Piu:我食Shabu Shabu一定唔少得和牛!呢度嘅佐賀A5黑毛和牛西冷入口軟滑,油花分佈得平均,淨係睇樣都流晒口水,稍為拖幾下放入口,牛味香而不膩,肉質軟滑,一份四片嚟計,我一個人都可以食到三份,當然,定食有埋其他嘢就梗係唔會淨食佢啦!建議牛魔王如我,(轉「心心眼」樣)最好約埋好似Eva咁樣嘅好朋友嚟,因為佢唔食牛,就可以理所當然食多份喇!

熊本豚腩肉(HK$39 / 客)





Eva:係,冇錯!我係唔食牛嘅!但我會食其他嘢,等價交易之嘛!所以,來自熊本嘅豚腩肉就歸我!呢碟豚肉雖然睇落肥膩,但入口只覺軟滑,肉味濃而不臊。講起熊本,大家都好關心當地情況,而一向與熊本縣關係友好嘅「温野菜」,早前更將連續十日新開業嘅收入,全數唔扣成本咁捐去熊本縣,而且,據店方透露,日後會盡量多採購來自熊本嘅食材,為當地出多一分力,淨係咁樣都已經抵畀Like啦!

豆腐麵(HK$15 / 客)




Uncle Piu:之前喺《搜食狂人》Facebook專頁同大家分享過一段短片(網址:https://www.facebook.com/fooddiscuss.fans/videos/984736468268914/),叫大家估下係咩嚟嘅食物,就係呢款豆腐麵喇!雖然個名話係麵,但其實用豆腐做,都幾特別,入口煙煙韌韌,值得大家試下。

盡收精華的「雜炊」(麵條HK$15;飯及各配料每款HK$9)

品嚐Shabu Shabu每個人喜好的次序各異,Eva喜歡先食蔬菜後食肉,而Uncle Piu就剛剛相反,先肉後菜,但兩位同樣認為Shabu Shabu尾聲一定要有雜炊先至夠完滿。「雜炊」是日本人品嚐Shabu Shabu後的飲食習慣,將飯或麵條(烏冬亦可)放入餘下的火鍋湯裡,再加入配料邊煮邊拌勻,再享用吸收了湯汁精華的飯或麵條。「温野菜」最近推出了野菌雜炊,利用本菇、白本菇及舞茸菇,再配搭玉子、白飯和鰹魚湯煮成雜炊,要是想進一步增加味道與口感層次的話,可以加入紫菜、米通、蔥。而Eva與Uncle Piu兩位愛「芝」狂人,則選了另一款受歡迎的特色雜炊──豆乳芝士雜炊。






Eva:豆乳芝士雜炊即是在有機豆乳湯中加入白飯、雞蛋和芝士等配料,要留意湯不能太多,先放入白飯,邊煮邊攪,跟住加雞蛋拌勻,最後放埋啲芝士攪拌到吸晒湯汁就食得!唔使怕唔識點處理,其實店員會出手,當然,想自己動手順便扮下嘢影張相呃Like亦都冇問題,同店員講聲就得。


Uncle Piu:呢個雜炊其實都唔錯嘅,不過,如果我下次再嚟食,會將啲菇菌類嘅食材留返到做雜炊前放埋落個湯度,增加口感層次,另外,由於自己鍾意芝士味再濃啲,所以會叫多一份芝士加落去,同埋睇下可唔可以做到拉絲嘅效果,做到嘅話就真係色香味全喇!


※ 「 實 食 」 總 結 ※




Uncle Piu:「有機會會再嚟。」
有機豆乳湯同埋佐賀A5黑毛和牛西冷我都鍾意,飲品方面推介可以試下活乳酸梳打,係今次失策在食得太飽,唔記得食甜品!另外,張枱上面有個Touch Screen方便Call侍應呢樣我都好欣賞,當然,特別鍾意座位設計得比較有私隱度,如果約朋友喺港島區食飯嘅話,有機會會再嚟。




Eva:「欣賞蔬菜類食物同VIP房。」

個環境咁舒服,雖然上樓但都係銅鑼灣區,所以價錢我覺得都合理。滿意呢度嘅蔬菜類食物質素,而且畀到我乾淨嘅感覺,我可以唔淥就咁生食都好放心,值得讚!呢度VIP房亦係吸引我之處,好適合約埋三五知己一路食一路傾一路笑。




「温野菜」銅鑼灣店
地  址:銅鑼灣Plaza 2000四樓全層
電  話:3709 8328
營業時間:1200至2300
備  註:加一服務費


搜食狂人呼籲:上述內容由本站派員親身採訪,旨在記錄相關飲食資訊,本站無法保證文中提及的食物水準、環境、服務質素、優惠與價錢恆久不變,敬請留意。如對上述內容有任何疑問或意見,歡迎到《搜食狂人》的 Facebook粉絲專頁(網址:www.facebook.com/fooddiscuss.fans)留言。


此網誌的熱門文章

【烹飪研習】超邪惡的懶人版「臘鴨髀蒸飯」

雖然十月已經過了三份二,仍然秋意薄弱,不過,臘味已經急不及待現身,而眾多臘味當中,又以臘鴨腿(又可稱為臘鴨髀或油鴨髀)最得小記歡心,看到臘味「出籠」,雖然明知尚未算最當造之時,但仍忍不住買來解饞。 撰文攝影:搜食採訪組

【烹飪研習】卡B私房菜食譜:香草焗羊架(做法簡單方便!)

食譜由CAROLBEE@卡B私房菜提供 撰文攝影:見習校對(部份圖片由CAROLBEE提供) 卡B版的焗羊架(羊鞍)做法十分方便,效果惹味而不羶,連一向抗拒羊羶味的朋友試過也要Encore! 卡B這道羊架做法簡單,怕羊羶味的朋友亦可共享,是不錯的宴客菜色。

【烹飪研習】搜食狂人湯水食譜──潺菜豆腐肉片湯

雖然立秋已過,但可能因為香港天氣仍然炎熱,所以,路經本地有機農場菜檔,竟然還有質素甚佳的潺菜供應,由於賣相實在吸引,二話不說買了半斤,再到豬肉檔要了二十塊錢的瘦肉,簡簡單單加兩片薑做一道滾湯。 撰文攝影:搜食編輯部 潺菜又可稱木耳菜、落葵、豆腐菜、藤菜。