搜尋文章

12.5.15

【人情味專訪】艾威的《搜食秘笈》(中)

艾威講飲食,味遊昔日情!

於「艾威的《搜食秘笈》(上)」,分享了艾威哥部份「搜食」熱點和美食推介,來到延續篇,且先讓他道出飲食宗旨,繼而帶領大家跳進時光機,共尋真正屬於香港的味道回憶……

攝影:Stephen@URIAH
撰文:搜食採訪組
場地:創動力媒體
鳴謝:(排名不分先後)艾威與多位餓底朋友提供部份圖片、甄子程Leslie、「百寶雞」梁虹光師傅



對每個人對飲食都有一定要求,艾威哥亦不例外。

「如果要喺餐廳環境同食物質素二揀一,我比較注重後者。美食一定係用心製作,呃唔到人,雖然每個人口味唔相同,但係我覺得有心嘅食店,好值得向朋友或網友推介,分甘同味嘛!如果遇到水準唔好嘅,除非真係太離譜,否則食過就算,當然都有試過令我食到一肚火嘅經歷,但係好明白依家香港營商唔容易,所以,亦唔會公開點名鬧。曾經有一次好離譜,喺某潮州菜館食生醃瀨尿蝦之後搞到甲型肝炎入醫院,呢次真係大單囉!搞到自己日後都有陰影,從此唔敢再食生醃瀨尿蝦,但我本身真係好鍾意食生嘢,所以,除咗呢樣(生醃瀨尿蝦)之外,其他好似刺身、生蠔、醬蟹、生牛肉……我都仲係好鍾意食。」艾威哥雖然平易近人,是朋友圈中的開心果,不過,無論演藝工作、待人處事,甚至飲食,也有自己一套宗旨和堅持。


艾威哥坦言頗懷念以前在大台收工之後,與蝦叔關海山及其他同事一起宵夜的美好時光:「大家邊食邊飲,講下工作上發生嘅事,又會檢討拍攝工作,果時大家感情好好,可惜依家各散東西,而且大家都怕肥,唔敢食咁多宵夜啦!」







「開工拍嘢都係食飯盒,唔會有咩要求,大家都係咁食,而且老實講,有飯盒食就代表有工開,好事喎!至於私人時間,通常同太太出去食飯,我鍾意叫幾道菜飲下酒,慢慢享受一段喺餐枱上嘅時光,所以,盡量唔會走去食『碟頭飯』,因為我覺得呢樣嘢(碟頭飯)係趕時間先食。另外,唔會連續食相同嘅嘢,例如呢餐食日本菜,下一餐可能食越南菜、西餐之類。當然,我亦有唔食嘅嘢,例如茨菰(亦稱為慈菇),總覺得味道好奇怪,但我媽咪好鍾意,反而我由細到大都唔識欣賞;鹹水角細個都食,但大個咗就覺得又鹹又甜嘅味道唔知想點咁,所以依家都唔會食;另外,因為環保唔食魚翅;亦因為睇過好多文章話雞腳上面有好多細菌,依家都少食,當然,如果做得好正,例如係鮑汁雞腳嘅話,我都會忍唔住叫嚟食。」艾威哥講食頭頭是道,再加上小時候住在旺角豉油街,以前附近有荷里活與南華兩間戲院,自然美食林立,理所當然以為他從小已是饞嘴一族,可惜,筆者這個想法大錯特錯。

小時候的艾威哥,在飲食方面沒有主導權,一切由家中長輩話事,家人喜歡在家吃飯,每日除了正餐之外,艾威哥亦少吃零食,間中吃到在街上推車仔擺賣的缽仔糕,已經樂上半天,甚麼味道也忘了,只記得一定要「多豆」。艾威哥坦言,對兒時食事的最深印象,反而以「難食的事」為多。

「記得當時大人硬係要我食飽肚嘢,例如媽咪最鍾意俾雞胸肉我食、去茶樓一定要我食叉燒包,屋企嘅菜色亦同樣以飽肚為主,梅菜蒸大魚都食唔少,因為大魚價錢平又夠份量,梅菜可以撈飯,咁一定夠飽啦!再加上自己冇話事權,所以細個屋企人話食乜我都會覺得難食!不過,依家諗返轉頭,當年香港整體環境都係咁上下,食物嘅用途只係為咗生存,又點會有咩高要求?坦白講,我屋企唔屬於豐衣足食嘅階層,能夠有一餐飽飯,當時來講已經係非常幸福嘅事。」


旺角的「榮園麵家」是香港小數仍然在巷裡經營的麵檔,艾威哥不時到這裡買外賣。

雖然兒時充滿「難食」回憶,但是,始終身處當年被喻為平民美食天堂之一的旺角區,在腦海中,還是保留了一些昔日的地道滋味……

「以前附近有條橫巷仔,裡面有檔雲吞麵,都唔記得三毫子定五毫子,就可以食到一碗細蓉(雲吞麵另一個廣東稱號),以前嘅雲吞好好食!依家雖然都仲有好多雲吞麵舖,不過都唔係間間做得好,而且,呢種喺橫巷嘅麵檔都好難搵喇!」筆者聽到此處,於是告訴艾威哥在旺角仍有小巷開設的麵檔,名叫「榮園麵家」,但此店並非以雲吞主打,反而是魚蛋魚片粉麵比較著名,他聽罷立即再次哈哈大笑,並拍一下額頭再說:「我記得喇!係呀!其實我間中嚟到旺角都會買,哈哈!都係知道點去但冇留意個名囉!」說罷又是一陣開朗的笑聲。


艾威哥也喜歡吃雲吞麵,最近,他找到一間麵店,還不忘通知同樣「為食」的筆者:「介紹妳去上海街165號左右一間雲吞麵試試,佢啲金魚散尾雲吞包得好正,可能係全宇宙最似金魚尾嘅雲吞。」

想當年旺角美食多不勝數,就是戲院門外的街頭小吃,都已是香港飲食歷史的經典。


著名的「肥姐小食店」滷味,亦是艾威哥的滋味回憶之一:「我細個住旺角近依家百老匯戲院附近嘅大廈,「肥姐」以前在果附近推車仔賣滷味,依家入咗舖,我都間中買嚟食。」

「到自己再大個少少,好鍾意去附近嘅荷里活戲院(己拆卸)睇電影,戲院出面有好多流動熟食小販,熱鬧到不得了!烤魷魚嘅香味傳遍成條街以外,我最鍾意食風琴魷魚,惹味又唔韌,諗起都流口水!仲有蒸花生、粟米,又有沙爹、煎釀三寶、魚肉碗仔翅……應有盡有,可惜依家有尐喺香港好難搵到,有尐入咗舖但已經唔係以前果種味道,如今仲叫做保持到嘅係『肥姐小食店』,以前肥姐推車仔喺街邊賣滷味,我依家間中都會幫襯,講起又想食喇!」艾威哥支持「肥姐小食店」,筆者可證絕對屬實,話說本來約他在旺角街頭拍一輯照片,他第一時間便建議到「肥姐」店外,可惜,剛剛遇上小店因事休息數天,當時,無論艾威哥、攝影師與筆者皆感無奈。後來,在訪問後不久,艾威哥親自再到「肥姐小食店」買了一盒豐富的滷味,還在網上發分享,引得筆者口水直流。


艾威哥於訪問後不久,專程到「肥姐小食店」買外賣並拍照上載到社交網站:「至爆測試尿酸水平法:一條友(中年或以上人士)一餐隊晒呢盒滷味,裡面有滷水香腸、大墨魚、豬肝、豬心、豬脷、豬頭肉、豬生腸、大生腸、雞腎,食完第二日冇腳腫代表尿酸水平仍安全。(識食,梗係食旺角肥姐出品啦)」又一次成功令人肚餓兼爆笑。(圖片由艾威哥提供)

(待續……)

搜食狂人呼籲:本文由人情味角度出發,與大家分享受訪者的飲食回憶及感覺,內容純屬個人主觀。如對本文內容有任何疑問或意見,歡迎到《搜食狂人》的Facebook粉絲專頁(網址:www.facebook.com/fooddiscuss.fans)留言。

Related Posts Plugin for WordPress, Blogger...